Barcelono: infero en la Turo

Dum sep monatoj, brazilanino Fernanda laboris en Barcelono, kiel moderigisto de videofilmoj, ĉe Competence Call Center, unu el entrepenoj kiuj laboras por Facebook kaj Instagram, kies adreso estas la turo Le Glòries, 38etaĝa, unu el la plej belaj konstruaĵoj en la urbo. La salajro estas tre alloga: preskaŭ 10 mil eŭroj monate.

Post analizo la moderigistoj baras ĉiujn videojn kiujn ili konsideras malkonvenaj pro troo da perfortoj, netaŭgaj seksaj scenoj, incito al malamo ekzemple. La laboro dependas de denuncoj farataj de la uzuloj de Facebook/Instagram, kiuj utiligas la tri punktetojn tiucele ĉe la supra kaj maldekstra angulo de la afiŝo. Ie en la mondo la denuncitaĵoj aperos sur la ekrano de moderigisto. La plejmulto de la denuncoj senditaj de brazilanoj estas taksata de Competence Call Center en Hispanio, kun ses mil funkciuloj, inter ili ĉirkaŭ 350 brazilanoj kiel Fernanda.

Sed multaj moderigistoj tute ne sukcesas rezisti al tiel altgrada nivelo de stresigo. Estis la kazo de Fernanda kaj aliaj kolegoj en Barcelono. Krom la fakto, ke temas pri 8 horoj da laboro potage, nur 20 minutoj el ili por manĝi ion, 45 minutoj semajne kiel rajto al ripozo, la konstanta spektado de tre ŝokaj kaj abomenindaj videoj kiel ekzemplo scenoj de perfortaj krimoj, pornografio eĉ kun prezentado de seksperfortoj de infanoj kaj bestoj povas kaŭzi seriozajn damaĝojn al la psika sano de la individuo.

Ŝi rakontas, ke iunokte kolego komencis sin mordi. “Li kriis, faris sonojn kvazaŭ li bojus. Oni bezonis tri horojn por trankviligi lin.” En la kazo de Fernanda, ŝi nuntempe submetiĝas al iu psikologia kuracado kaj prenas kontraŭdeprimilojn. Ŝi ne sukcesas forgesi i.a. la scenon de bebo kiu estis ĵetata de iu muro al alia.

Teksto bazita sur la raportaĵo Inferno na torre, de Lílian Cunha, publikigita en CartaCapital de 17/apr/2019.